Միջազգային վեհաժողով` ֆակուլտետի 50-ամյակի առիթով

Շնորհիվ նորագույն տեխնոլոգիաների ներդրման, գերժամանակակից եղանակների կիրառման, աշխարհում մեծ առաջընթաց է ապրել ստոմատոլոգիան իր բոլոր դրսևորումներով: Խոսքն այն ամենի մասին է, ինչն առնչվում է ստոմատոլոգիական խնդիրներին` կանխարգելումից մինչև ատամի բուժում և վերականգնում:

Մեծ առաջընթաց է ապրել նաև հայկական ստոմատոլոգիան, որն իր գոյության տասնամյակների ընթացքում, շնորհիվ հայ ստոմատոլոգների և գիտնական բժիշկների ձեռքբերումների, միջազգային ճանաչման է արժանացել:

50 տարի առաջ Երևանի պետական բժշկական ինստիտուտում հիմնադրվեց ստոմատոլոգիական ֆակուլտետը, որի հետևողական և արդյունավետ գործունեության արդյունքում հրապարակի վրա հայտնվեցին ստոմատոլոգ բժիշկ գիտնականներ, ում նորամուծություններն ու բուժման արդիական եղանակներն այսօր էլ իրենց կիրառությունն են գտել ոչ միայն Հայաստանում և ԱՊՀ երկրներում, այլև արտասահմանյան առաջավոր պետություններում:

Հայ ճանաչված ստոմատոլոգները մասնագիտացված կլինիկաներ և ֆակուլտետներ են ղեկավարել Ռուսաստանի Դաշնությունում, ԱՄՆ-ում, Կանադայում, Ֆրանսիայում, Գերմանիայում, Վրաստանում, Ուկրաինայում և այլուր, ստոմատոլոգիական կրթության և գիտության հայկական ասոցիացիան սերտ համագործակցության մեջ է տասնյակ երկրների նույնանուն ասոցիացիաների հետ, ինչն արտահայտվում է ոչ միայն փոխադարձ այցերով, այլև կադրերի ու փորձի փոխանակմամբ, շարունակական կրթության և որակավորման բարձրացման ընձեռած հնարավորություններով:

Երևանի Մխիթար Հերացու անվան պետական բժշկական համալսարանում վերջերս մեկնարկեց ստոմատոլոգիական ֆակուլտետի 50-ամյակին նվիրված միջազգային երկրորդ վեհաժողովը, որի աշխատանքներին մասնակցում էին աշխարհի 30 երկրների ճանաչված ստոմատոլոգ գիտնականներ, նրանց թվում մեր հայրենակիցներ Տորոնտոյի համալսարանի էնդօդոնտիայի խորհրդատու Զարեհ Ուզունյանը (Կանադա), Նյու Յորքի Վետերանների բժշկական կենտրոնի պարօդոնտոլոգիայի ռեզիգդենտուրայի ծրագրերի ղեկավար, Նյու Յորքի բժշկական համալսարանի ատամնաբուժական դպրոցի կլինիկական վիրաբուժության մասնագետ Գրեգորի Կազանջյանը (ԱՄՆ) և այլոք:

Ստոմատոլոգիական II վեհաժողովը բացեց ԵՊԲՀ-ի ստոմատոլոգիական ֆակուլտետի դեկան, ՀՀ ԱՆ գլխավոր ստոմատոլոգ, ստոմատոլոգիական կրթության և գիտության ասոցիացիայի նախագահ Լազար Եսայանը` նշելով, որ կեսդարյա կենսագրություն ունեցող ֆակուլտետը հիրավի արժանի է ոչ միայն նմանատիպ վեհաժողով կազմակերպելու պատվին, այլև իր գործունեությամբ նվաճել է միջազգայնորեն մեծարվելու և արժևորվելու իրավունքը:

ԵՊԲՀ-ի ռեկտոր, վեհաժողովի պատվավոր նախագահ, բ.գ.դ., պրոֆեսոր Դերենիկ Դումանյանը միջոցառման մասնակիցների ներկայացուցչական կազմի մասնակցությունը պայմանավորեց հայ ստոմատոլոգների ձեռք բերած հաջողություններով, միջազգային գործընկերների հետ փոխշահավետ համագործակցությամբ և գտավ, որ ընթերցվող զեկուցումներն ու մտքերի փոխանակությունը ևս մեկ քայլով առաջ կմղեն ստոմատոլոգիայի ասպարեզում մինչ օրս ձեռք բերած նվաճումները:

Ողջունելով մասնակիցներին և հյուրերին, ՀՀ առողջապահության նախարար Հարություն Քուշկյանն ընդգծեց, որ իր սկզբնավորման օրվանից հայկական ստոմատոլոգիական ծառայությունը մշտապես առաջատար դիրքերում է եղել, իսկ ֆակուլտետի առկայությունը խթանել է բարձր որակավորմամբ մասնագետների գործունեությունը:

Նա միաժամանակ իր մտահոգությունը հայտնեց այն խնդրի շուրջ, որ առաջացել է ոլորտում որոշ մասնագետների անբարեխիղճ աշխատանքի հետևանքով։

«Մեր առաջիկա խնդիրներից է արմատախիլ անել այդ երևույթները»,- ասել է առողջապահության նախարարը` նկատելով, որ նմանատիպ հավաքները նշանակալի են առողջապահական համակարգի խնդիրների լուծման, անցած փորձը, ներկա և հեռանկարային գործընթացներն ամփոփվելու համար:

Վեհաժողովին շնորհավորական ուղերձներ են հղել Եվրոպայում ատամնաբուժական կրթության ասոցիացիան, Մոսկվայի պետական բժշկական ստոմատոլոգիական համալսարանը և այլ կազմակերպություններ:

Օմսկի պետական բժշկական համալսարանի ստոմատոլոգիական ֆակուլտետի դեկան, Թերապևտիկ ստոմատոլոգիայի ամբիոնի վարիչ Լարիսա Լոմիաշվիլին, շնորհակալություն հայտնելով վեհաժողովին մասնակցելու հրավերի համար, առանձնահատուկ ընդգծեց, որ բացի բազմաթիվ ընթերցվող ուշագրավ զեկուցումներից, այլազգի մասնակիցները հայ ժողովրդին և Հայաստանին մոտիկից ճանաչելու և հաղորդակցվելու հնարավորություն ունեն: Նա Օմսկի համալսարանի հոբելյանական մեդալներ հանձնեց ԵՊԲՀ-ի ռեկտոր Դ.Դումանյանին և Ստոմատոլոգիական կրթության և գիտության ասոցիացիայի նախագահ Լ.Եսայանին:

Ստոմատոլոգիայի զարգացման գործում ունեցած ավանդի համար ՀՀ Առողջապահության նախարար Հարություն Քուշկյանին շնորհվեց Ստոմատոլոգիական կրթություն և գիտություն ասոցիացիայի ոսկե մեդալ: Ոսկե մեդալներով պարգևատրվեցին նաև ստոմատոլոգիական ոլորտում զգալի ներդրում ունեցած մի շարք պրոֆեսորներ:

Խորհրդանշական է, որ Երևանի պետական բժշկական ինստիտուտի ստոմատոլոգիական ֆակուլտետի 1967 թվականի առաջին շրջանավարտները բոլորն էլ արժանացան Ստոմատոլոգիական կրթություն և գիտություն ասոցիացիայի պատվոգրի։

Վեհաժողովի երեք օրերի ընթացքում ընթերցվեցին 50-ից ավելի զեկուցումներ (այդ թվում նաև ուսանողական), որոնք արժանացան բուռն քննարկումների:

Վեհաժողովի շրջանակներում հրավիրված մասնագետներից Ինգո Շպրինգերը, Վլադիմիր Մադյուդյանը, Տիգրան Մարիտիրոսյանը, Գրիգոր Ավետիքյանը մասնակիցների համար անցկացրեցին վարպետության  դասընթացներ, որոնք մասնավորապես վերաբերում էին փափուկ հյուսվածքների վերակառուցմանը իմպլանտի շուրջ, գեղագիտական ստոմատոլոգիայում մոդուլային տեխնոլոգիաների, ատամների սպիտակեցման, էնդօդոնտիայի խնդիրների քննարկմանը:

Վեհաժողովի շրջանակներում կազմակերպվել է ստոմատոլոգիական նյութերի, գործիքների և սարքավորումների ցուցահանդես։

Հարցեր, պատասխաններ, մեկնաբանություններ